மதுரை இரயில்வே கோட்ட மேலாளரை நேரில் சந்தித்து தென்காசி மாவட்டம் கடையநல்லூர் சட்டமன்ற உறுப்பினர் தி.மு.இராசேந்திரன் கிராம மக்கள் பயன்பெறும் வகையில் பல்வேறு கோரிக்கைகளை வலியுறுத்தி நேரில் மனு கொடுத்துள்ளார்.
அந்தக் கோரிக்கை மனுவில் அவர் கூறி இருப்பதாவது.
வண்டி எண் 16101/16102 தாம்பரம் – கொல்லம் தாம்பரம் விரைவு இரயிலை பகவதிபுரம் இரயில் நிலையத்தில் நின்று செல்ல நடவடிக்கை எடுக்க வேண்டும். கடையநல்லூர் தென்காசி இரயில் நிலையங்களுக்கிடையே மீட்டர் கேஜ் காலம் தொட்டு இயங்கிவந்த நயினாரகரம் இரயில் நிலையத்தை மீண்டும் புனரமைத்து அதனைச் சுற்றியுள்ள கிராம மக்கள் பயன்பெறும் வகையில் மீண்டும் செயல்பட நடவடிக்கை எடுக்க வேண்டும்.
திருநெல்வேலியிலிருந்து தென்காசி, கடையநல்லூர், இராஜபாளையம் மதுரை, கரூர், சேலம் வழியாக பெங்களூருக்கு தினசரி இரயில் சேவையை துவங்க வேண்டும். வாரம் ஒருமுறை செல்லும் திருநெல்வேலி – மேட்டுப்பாளையம் (வழி–கடையநல்லூர்) வாராந்திர இரயில் சேவையை தினசரி இரயில் சேவையாக மாற்ற வேண்டும். மீட்டர்கேஜ் காலத்தில் தென்காசி – செங்கோட்டை பகவதிபுரம் வழியாக இயங்கிய நெல்லை கொல்லம் பகல் நேர பயணிகள் இரயிலை மீண்டும் இயக்க நடவடிக்கை எடுக்க வேண்டும்.
வண்டி எண் 20681/20682 சிலம்பு எக்ஸ்பிரஸ் மற்றும் வண்டி எண் 20683/20684 தாம்பரம் செங்கோட்டை எக்ஸ்பிரஸ் ஆகிய இரயில்களை வாரத்திற்கு மூன்று நாட்கள் இயக்கப்படுவதை தினசரி இரயில்களாக மாற்றி இயக்க வேண்டும்.வண்டி எண் 16721/16722 கோயம்புத்தூர் மதுரை இடையே இயக்கப்படும் இண்டர்சிட்டி எக்ஸ்பிரஸை இராஜபாளையம், கடையநல்லூர், தென்காசி வழியாக செங்கோட்டை வரை நீட்டிப்பு செய்ய வேண்டும்.பயணிகள் வசதிக்காகவும், கூடுதல் இரயில்களை இயக்க வசதியாகவும் செங்கோட்டை இரயில் நிலையத்தில் ஐந்தாவது பிளாட் பாரம் அமைக்கும் பணியை விரைவில் தொடங்கநடவடிக்கை எடுக்க வேண்டும். பயணிகளின் வசதிக்காகவும், இரயில் பெட்டிகளை திறம்பட கையாளவும் செங்கோட்டை இரயில் நிலையத்தில் உள்ள 5 மற்றும் 6வது இரயில்வே வழித்தடத்தை மேற்குப் பகுதியுடன் இணைக்க வேண்டும்.இரயில்களை விரைவாக இயக்கவும், பொதுமக்களில் பயண நேரத்தை மிச்சப்படுத்த வும், தென்காசி – செங்கோட்டை இடையே உள்ள 8 கிலோ மீட்டர் இரயில் வழித்தடத்தை இரட்டை இரயில் வழிப்பாதையாக மாற்ற நடவடிக்கை எடுக்க வேண்டும்.
செங்கோட்டை இரயில் நிலையத்தில் 4 மற்றும் 5 வது பிளாட் பாரத்தில் இறங்கும் முதியவர்கள், குழந்தைகள்,கர்ப்பிணி பெண்கள் வசதிக்காக தானியங்கி வசதி (லிப்ட்) ஏற்படுத்திட நடவடிக்கை எடுக்க வேண்டும். செங்கோட்டை மற்றும் கடையநல்லூர் இரயில் நிலையங்களை அம்ரித் பாரத் திட்டத்தின்கீழ் உட்கட்டமைப்பை நவீனப்படுத்தி பயணிகளின் நலனை பாதுகாக்கவும், பயணிகளுக்கு சிறந்த சேவையை வழங்கவும் நடவடிக்கை எடுக்க வேண்டும்.
கடையநல்லூர் மற்றும் செங்கோட்டையில் இரயில் நிலை யங்களில் கோச் விபரத்தினை டிஜிட்டல் ஒளி முறையில் பயணிகளுக்கு கோச் எண்கள் தெளிவாக தெரியுமாறு அமைத்திடல் வேண்டும்.என தெரிவித்துள்ளார். மனுவை பெற்றுக் கொண்ட இரயில்வே கோட்ட மேலாளர் விரைவில் உரிய நடவடிக்கை எடுப்பதாக தெரிவித்தார்.
.jpeg)
