“என் கழிவு – என் பொறுப்பு” என்ற அடிப்படையில் தூய்மையான மதுரையை உருவாக்க நடவடிக்கை
மதுரை: மதுரை மாநகராட்சியில் தூய்மை மற்றும் சுற்றுச்சூழல் பாதுகாப்பை மேம்படுத்தும் வகையில், மொத்தக் கழிவு உருவாக்குநர்களுக்கு (Bulk Waste Generators – BWGs) திடக்கழிவு மேலாண்மை விதிகள் 2026 குறித்து விழிப்புணர்வு மற்றும் ஆலோசனைக் கூட்டம் நடைபெற்றது.
மதுரை மாநகராட்சி மண்டலம்–1 கிழக்கு மண்டல அலுவலகத்தில் இன்று (28.08.2026) மாநகராட்சி சுகாதாரத் துறை சார்பில் நடைபெற்ற இக்கூட்டத்தில், மண்டலம்–1 மற்றும் மண்டலம்–2 பகுதிகளில் உள்ள மொத்தக் கழிவு உருவாக்குநர்கள் கலந்து கொண்டனர்.
கூட்டத்தில் மாநகராட்சி நகர்நல அலுவலர் டாக்டர் அரவிந்த் ஜோதி, சுகாதார அலுவலர் ராஜ் கண்ணன் மற்றும் சுகாதார ஆய்வாளர்கள் பங்கேற்று, திடக்கழிவு மேலாண்மை விதிகள் 2026 தொடர்பான வழிகாட்டுதல்கள் மற்றும் முறையான கழிவு மேலாண்மை நடைமுறைகள் குறித்து விரிவாக எடுத்துரைத்தனர்.
மொத்தக் கழிவு உருவாக்குநர்கள் தங்கள் நிறுவனங்களில் உருவாகும் கழிவுகளை மூலத்திலேயே முறையாகப் பிரித்தல், ஈரக்கழிவு மற்றும் உலர்கழிவுகளை தனித்தனியாகக் கையாளுதல், உணவுக் கழிவுகளை முறையாகச் செயலாக்குதல் உள்ளிட்ட நடைமுறைகளை கட்டாயம் பின்பற்ற வேண்டும் என கூட்டத்தில் அறிவுறுத்தப்பட்டது.
மேலும், “என் கழிவு – என் பொறுப்பு” என்ற அடிப்படையில் திடக்கழிவு மேலாண்மை விதிகள் 2026-ஐ முழுமையாகப் பின்பற்றி, மாநகராட்சியின் தூய்மை மற்றும் சுற்றுச்சூழல் பாதுகாப்பு நடவடிக்கைகளுக்கு அனைவரும் ஒத்துழைப்பு வழங்க வேண்டும் என வலியுறுத்தப்பட்டது.
மதுரை மாநகராட்சியை தூய்மையான மாநகரமாக மாற்றும் நோக்கில், கழிவு மேலாண்மை தொடர்பான விழிப்புணர்வு நடவடிக்கைகளுக்கு தொடர்ந்து முக்கியத்துவம் அளித்து வரும் மாநகராட்சி ஆணையர் கௌரவ்குமார் அவர்களின் நிர்வாக அணுகுமுறைக்கு பொதுமக்கள் மத்தியில் பாராட்டு எழுந்துள்ளது.
கழிவுகளை அகற்றுவது மட்டுமே தூய்மை பணியாக இல்லாமல், கழிவு உருவாகும் இடத்திலேயே அதனை முறையாகப் பிரித்து, பொறுப்புடன் கையாளும் பழக்கத்தை உருவாக்குவது தான் நீடித்த தூய்மைக்கு அடித்தளம். அந்த வகையில் மொத்தக் கழிவு உருவாக்குநர்களை நேரடியாக அழைத்து விழிப்புணர்வு ஏற்படுத்தியிருப்பது குறிப்பிடத்தக்க நடவடிக்கையாக பார்க்கப்படுகிறது.
இக்கூட்டத்தில் நேரடியாக பங்கேற்று திடக்கழிவு மேலாண்மை விதிகள் மற்றும் கழிவுகளை கையாளும் முறைகள் குறித்து விளக்கம் அளித்த மாநகராட்சி நகர்நல அலுவலர் டாக்டர் அரவிந்த் ஜோதி அவர்களின் செயல்பாடும் பாராட்டுக்குரியது.
சட்ட விதிகளை வெறுமனே அமல்படுத்துவதுடன் நின்றுவிடாமல், அவற்றின் அவசியத்தை கழிவு உருவாக்குநர்களுக்கு எடுத்துரைத்து, அவர்களின் ஒத்துழைப்புடன் தூய்மை பணிகளை முன்னெடுக்கும் அணுகுமுறை மாநகராட்சியின் தூய்மை நிர்வாகத்திற்கு வலுசேர்க்கும் என எதிர்பார்க்கப்படுகிறது.
“என் கழிவு – என் பொறுப்பு” என்ற கருத்தை பொதுமக்கள், நிறுவனங்கள் மற்றும் வணிக நிறுவனங்களிடையே நடைமுறைப்படுத்தும் வகையில் இதுபோன்ற விழிப்புணர்வு கூட்டங்கள் தொடர்ந்து நடத்தப்பட்டால், மதுரை மாநகரின் தூய்மை மற்றும் சுற்றுச்சூழல் பாதுகாப்பில் குறிப்பிடத்தக்க முன்னேற்றம் ஏற்படும்.
